Agim Bahtiri, kryetari i Mitrovicës Jugore ka kërkuar nga Qeveria që të shfuqizohet vendimi për ndarjen e kësaj komune në dy pjesë.

Këtë kërkesë ai sot e ka bërë legjitime edhe përmes asamblesë komunale.

Asambleistët e Mitrovicës sot unanimisht kanë votuar iniciativën e ndryshimit të ligjit për kufijtë administrativë të komunave, me qëllim bashkimin e pjesës veriore me atë jugore.

Por këtë veprim të asambleistëve, gazetari Arben Ahmeti e ka konsideruar joserioz.

“Është akt simpatik çka ka bërë komuna, është vetëm shprehje e vullnetit politik – që mbetet vetëm kaq”, ka thënë Ahmeti në Info Magazine.

“Vullnet politik që nuk përkon me realitetin është vetëm shprehje e dëshirës – asgjë më shumë. Shpresoj qe vetëdija jonë qytetare është aq e lartë sa ta kuptojnë se ky është vetëm një gjest sipmatik”.

Ahmeti ka thënë vetëm Kuvendi i ndryshon ligjet dhe se këtë nuk mund ta bëj askush tjetër.

“Madje nëse kjo ndodh Kuvendi duhet ta ndryshoj edhe Kushtetutën, sepse është e bazuar nga Pakoja e Ahtisarit, e vetëm sipas kësaj pakoje përcaktohen kufijtë e Mitrovicës”.

Ai madje duke ironizuar me këtë nismë të Bahtirit, ka thënë se ky është një sukses historik i kryetarit të Mitrovicës Jugore.

“Atë çfarë s’ka mund ta bëj Hashim Thaçi, Kadri Veseli apo Ramush Haradinaj, sot e arriti Agim Bahtiri. Kjo është përtej potencialeve tona absorbuese, kjo tejkalon masat globale. Bahtiri ka bërë një vepër të jashtëzakonshme.”